淺談我心中的周傑倫最佳專輯

Sun, 02 Mar 2025 11:06:05 +0800

< 9.2 >

歌曲可以擁有與電影媲美的敘事性嗎？在短短四分鐘左右的歌曲裡，43 分鐘的專輯「八度空間」中，周杰倫用旺盛的創作力和狂想嘗試建構出這樣的「空間」。「八度空間」意指西方的八度音階，在看似局限的音樂空間中，周杰倫用他平時從電影和 MV 得來的靈感，給每首歌曲賦予了情節，打造沒有維度限制的音樂異想世界。

Album

《八度空間》，喺我心目中，係周杰倫非常之unbelievable嘅一隻碟。或者喺大眾心目中稱得上神碟嘅，十居其九都係《Jay》、《范特西》同《葉惠美》之中三揀一。而音樂圈仲有個講法，話天才音樂人出三隻碟就玩完（呢個就不得不提隔籬檯真·出道即巔峰嘅歌手啦）：第一隻係開山劈石，第二隻係大獲成功，第三隻就係困獸之鬥。當然，後來《葉惠美》成功證明咗周杰倫嘅創作天賦絕對唔會局限喺三隻碟之內，去到《七里香》同《十一月的蕭邦》，佢嘅人氣直頭再創高峰。但係我仲係要講，《八度空間》係周杰倫嘅異數，係佢咁多巔峰神碟之中最唔似周杰倫style嘅專輯，氣質獨特又夠厚實，概念唔落俗套仲玩到好多面向，真係聽極都唔厭嘅。
不過咧，點解呢度係粵語博客但係要講Jay呢？因為佢對我嘅音樂影響真係好大。無論係音樂嘅廣度定係深度，都有非常多拎得出手嘅作品。咁踏入千禧年之後，講得出手嘅粵語歌手已經唔多；至於譚詠麟張學友佢哋，又係啲屬於上古神獸級數嘅存在啦。

半獸人

前奏弦樂組同號角聲夠晒磅礴，又帶住絲絲蒼涼——全因木管同銅管聲部做底，中間定音鼓「咚咚咚」喺打著拍子之餘，直頭有種史詩片頭曲嘅氣勢！其實呢四十幾秒前奏可以當成成張碟嘅《Intro》，in fact仲係周生第一次玩專輯開場彩蛋。最過癮係呢段前奏同碟尾《最後的戰役》遙相呼應，兩首都用晒悲壯銅管聲，成隻碟嘅tone即刻統一起嚟。後尾《葉惠美》嘅《以父之名》開場雖然都玩類似手法，但同成張碟格調似乎無咩呼應咁囖（查實四專到底係咩格調呢）

弦樂風暴過後，幾下重鼓夾雜打碟聲「唰唰」殺到，正式拉開半獸人世界大幕。豎起耳仔聽真啲，除咗小提琴嘅頓弓，底層仲有鋼琴暗湧，同弦樂組玩緊同頻率心跳。話時話周生雖然係節奏鬼才，但編曲層次從來唔孤寒，難怪啲歌聽極唔厭。講到主歌部分，經典嘅Jay式flow配合住方文山堆砌嘅奇幻詞藻，尤其第一次入副歌前嗰段節奏錯位嘅bridge，夠晒過癮！呢種「玩嘢」間唔中出現係幾過癮，同《藍色風暴》尾奏嗰段變調都係異曲同工。至於副歌同尾奏銅管組發揮正常，成首歌暗藏嘅編曲機關其實幾有心思，可惜好似冇乜人buy呢啲細節囉。

‍ ‍唱 ‍‍‍‍ 7.1

‍ ‍詞 ‍‍‍‍ 7.6

‍ ‍編 ‍‍‍‍ 8.2

‍總分 7.9

半島鐵盒

《半獸人》來勢洶湧嘅開篇之後，周杰倫揀咗首慢板歌做承接。旋律平穩自然，律動和諧流暢，悲傷嘅結他聲喺漫不經心嘅氣氛度穿插。密密麻麻嘅踩鐙聲似啲窸窸窣窣嘅細響，喺平靜嘅弦樂底下滲出絲絲忐忑。通過不斷變調營造出情感上嘅猶豫同孤寂，跟住首歌推進，情緒越煲越濃。順便講句，今次隻碟嘅混音技術真係大躍進，雖然未及後來《七里香》同《十一月嘅蕭邦》嗰種大製作級數，但整體嚟講已經交足功課。至於《半島鐵盒》嘅編曲，雖然冇乜特別多花臣可以拆解，但反而係周杰倫少有無點加花嘅作品，情感表達收放自如又入心入肺。喺而家呢個碎片化時代，想再聽到呢種純粹嘅新作，恐妨都幾艱難喇。

‍ ‍唱 ‍‍‍‍ 8.8

‍ ‍詞 ‍‍‍‍ 7.4

‍ ‍編 ‍‍‍‍ 7.9

‍總分 8.1

暗號

同上一隻碟嘅主打歌《愛在西元前》差唔多套路嘅周氏 R&B 情歌，總體情緒都係嗰種憂鬱嘅味道，不過今次首歌嘅情緒起伏波動大咗好多。密集嘅真假音轉換喺音域跨度唔大嘅情況下都算交到功課， bridge 嗰段帶哭腔假音加升 key 好順滑，成首歌即刻生猛晒。不過相比返前作，呢首歌明顯少咗啲「周杰倫」嘅標誌性味道，算係全隻碟少有嘅流水線式有啲普通嘅作品，好彩可能係 bridge 段假音真係夠靚，令成首歌襟聽好多。唔通係多得嗰個神級 Live 現場？

‍ ‍唱 ‍‍‍‍ 8.5

‍ ‍詞 ‍‍‍‍ 7.6

‍ ‍編 ‍‍‍‍ 7.3

‍總分 8.0

龍拳

自從《雙截棍》紅到發紫之後，周杰倫摸到中國風 + 搖滾嘅路數，搞到下一隻碟都出咗同款套路嘅《雙刀》（不過估計《雙刀》反應麻麻，所以 Jay 收埋呢種套路一排，直到《霍元甲》先再拎返出嚟？）。鼓聲開頭之後突然插段估佢唔到嘅搓碟，跟住勁爆電吉他直轟耳仔殺到。到呢 part 周杰倫招牌四聲音調 rap 夾住方文山啲詞真係夾到絕，主歌異常帶感之後接段古箏畀聽眾抖啖氣。到咗 bridge 段 Jay 又開始玩嘢，一句「慢着」即刻畀首歌轉 groove ，狂轟濫炸之中留低啲餘韻。成首歌大起大落但又唔似《土耳其冰淇淋》咁花多眼亂，擺喺隻碟中段仲有提神醒腦之效。

‍ ‍唱 ‍‍‍‍ 8.1

‍ ‍詞 ‍‍‍‍ 8.5

‍ ‍編 ‍‍‍‍ 8.6

‍總分 7.8

火車叨位去

喺抖順啖氣之後，隻碟又返到嗰浸 dup 頭 dup 尾嘅氣氛。喃喃自語嘅 Rap 夾住閩南話，好容易勾出舊時嗰種古仔畫面。開頭火車撞鐵軌嘅鏘鏘聲，一嘢就將人扯返去慢節奏嘅舊時光，編曲平淡之中暗藏唔少心機位，令人聽到上癮。雖然個名同羅大佑嘅《火車》好似，但兩者根本南轅北轍。《火車叨位去》冇《火車》寫得咁激昂，翳悶嘅氣氛、呼應嘅和聲、同埋啲似撞軌聲嘅鼓組，夾埋就成首獨樹一幟嘅閩南話歌。最可惜係 Jay 之後冇再出類似作品，喺我心中真係首滄海遺珠。

‍ ‍唱 ‍‍‍‍ 7.9

‍ ‍詞 ‍‍‍‍ 7.8

‍ ‍編 ‍‍‍‍ 8.9

‍總分 8.6

分裂

難得交心嘅周杰倫喺呢首歌度剖白心跡，靠幾個和弦嘅情感層次嚟煲出份柔弱感。冇將自己包裝成無所不能嘅強者，面對時間同回憶流逝嘅無力感，延續住前面《半島鐵盒》《暗號》嗰種一脈相承嘅迷失。睇返之後幾張碟，佢開始有啲膨脹（唔係貶義），會話自己冇獎攞係金曲獎班評審問題，會立志做音樂皇帝，會強調自己係超人；返轉頭再聽呢首，先發覺原來呢個先係周杰倫難得脫下光環、以「普通人」姿態歷經滄桑後嘅內心獨白，亦令首歌多咗份延綿嘅情緒。成首歌雖然簡單到冇朋友，但勝在夠真，正正係呢份赤誠令首歌有咗獨門嘅風味。

‍ ‍唱 ‍‍‍‍ 8.0

‍ ‍詞 ‍‍‍‍ 7.5

‍ ‍編 ‍‍‍‍ 7.7

‍總分 8.2

爺爺泡的茶

《爺爺泡嘅茶》整到成浸輕飄飄嘅感覺，有啲似《簡單愛》嗰種爽朗，編曲都係林邁可最耍家最自在嘅 R&B 路數，清脆鼓點夾埋周杰倫清透難得咬字正嘅唱腔，一句講晒：夠晒舒服、夠晒純粹。

‍ ‍唱 ‍‍‍‍ 6.9

‍ ‍詞 ‍‍‍‍ 7.0

‍ ‍編 ‍‍‍‍ 7.5

‍總分 7.5

回到過去

去到《回到過去》，結他同弦樂編排依然順滑到冇得頂，但同《暗號》一樣走輕鬆歡快路線，真係唔係我杯茶。（感覺呢首歌好兩極分化，鍾意嘅人當寶，唔 buy 嘅人完全冇感（講咗等於冇講

‍ ‍唱 ‍‍‍‍ 7.1

‍ ‍詞 ‍‍‍‍ 6.9

‍ ‍編 ‍‍‍‍ 6.6

‍總分 6.8

米蘭的小鐵匠

《米蘭的小鐵匠》可能會諗起同期佢寫畀蔡依林嗰啲歌，搓碟同各式聲效純粹係幫成首歌吊味，等聽眾唔使分心。前奏嘅 MIDI 銅管聲浸出嚟嗰浸翳悶氣氛，好似一本故事書開頭先介紹環境，一嘢就令人見到米蘭個陰天。跟手結他突然醒神彈起，嗰種彈跳感恍如照住小鐵匠嗰副威威勢勢嘅樣。副歌唱完「吱呀」一聲閂埋酒館門，小鐵匠坐定定聽台上演奏，唔知唔覺個腦度播緊自己第日坐喺台上，台下掌聲雷動嘅畫面。點知幾聲狗吠扯返佢返現實，最後嗰聲「咩」真係有啲歐亨利式結尾嘅味道。

‍ ‍唱 ‍‍‍‍ 8.6

‍ ‍詞 ‍‍‍‍ 9.0

‍ ‍編 ‍‍‍‍ 9.3

‍總分 9.3

最後的戰役

《最後的戰役》比起兩年後同屬壓軸兼講戰爭嘅《止戰之殤》，畀成隻碟落咗個更深沉宏大嘅句號，當然接住《米蘭的小鐵匠》後面，同前文嗰浸收斂嘅傷感底色都算夾得埋。第二段主歌轉唱腔令成首歌更襟聽，最尾蘇格蘭風笛係周杰倫拿手嘅異國音色殺手鐧，但配埋弦樂組明快嘅大調編排，反差得嚟又唔覺矛盾。成隻碟行到呢度，延續咗頭兩張專輯收尾嗰份恰到好處。

‍ ‍唱 ‍‍‍‍ 7.6

‍ ‍詞 ‍‍‍‍ 9.2

‍ ‍編 ‍‍‍‍ 8.8